Breilobekken kraftverk vil etter dei framlagde planane nytte ei fallhøgd på 233 m, med inntak på kote 483 og kraftstasjon på kote 250. Samstundes vil også vasspegelen i tjernet Paulan hevast permanent med 2 m, frå kote 483 til kote 485.
Vatnet skal førast i tunnel frå inntaket og ned til ca. kote 460. Vidare mot kraftstasjonen skal vassrøyret ligge nedgrave. Eksisterande skogsveg vil verte forlenga med ca. 400 m opp til påhogg for tunnel og verte permanent.
Hovudproblemstillinga i denne saka har vore konsekvensar for landskapet. Dette er mellom anna grunna ei vurdering i Sirdal kommune sin kommunedelplan for småkraftverk. NVE og høyringspartane meiner likevel dei endringane som no er gjort, som til dømes ei utbyggingsløysing der øvre del av vassvegen går i tunnel, vil gjere tiltaket akseptabelt i høve til landskap.
Med ei utbygging der øvre del av vassvegen går i tunnel og med ei god planlegging i høve til utføring av anleggsarbeidet, vurderer NVE at tiltaket ikkje vil medføre vesentlege ulemper for allmenta. Samstundes vil tiltaket gje om lag 4 GWh/år i fornybar energiproduksjon. NVE har på bakgrunn av dette gjeve Skeie Småkraft løyve til bygging av Breilobekken kraftverk på nærare fastsette vilkår.
